मेथीचे गोळे - पाककृती - मराठीमाती । माझ्या मातीचे गायन

मेथीचे गोळे - पाककृती

मेथीचे गोळे, पाककला - [Methi Gole, Recipe] लहान मुलांना मेथीच्या भाजीचा कंटाळा असतोच तेव्हा मेथीच्या भाजीवर जरा चविष्ट संस्कार केल्यास मुलांना मेथीची भाजी हवी हवीशी वाटेल यात शंका नाही. ‘मेथीचे गोळे’ हा पदार्थ आपण नाश्त्यामध्ये, मधल्या वेळेत किंवा जेवणात स्टार्टर म्हणून खाऊ शकतो तसेच प्रवासात/सहलीला डब्यात देण्यासाठी हा पदार्थ उपयुक्त आहे.

खास लहान मुलांसाठी तसेच स्टार्टर म्हणून खाता येणारे चटपटीत मेथीचे गोळे

‘मेथीचे गोळे’साठी लागणारा जिन्नस

१ मध्यम आकाराची मेथीची जुडी
१ वाटी डाळीचे पीठ (बेसन)
५-६ हिरव्या मिरच्या
थोडी कोथिंबीर
१/२ चमचा धणे कुटून
मीठ
हळद
मोहनासाठी तेल

‘मेथीचे गोळे’ची पाककृती

मेथी बारीक चिरुन घ्यावी व धुवून चाळणीवर निथळत ठेवावी. मिरच्या बारीक चिराव्यात.
नंतर डाळीचे पीठ, हिरव्या मिरच्या, कोथिंबीर, कुटलेले धणे, हळद आणि चवीनुसार मीठ एकत्र करुन पीठ भिजवावे. नंतर त्याचे सुपारीएवढे गोळे करावेत व किंचित लांबट आकार द्यावा.
आता कुकरमध्ये चाळणीला तेलाचा हात लावून त्यावर हे गोळे ठेवून वाफवून घ्यावेत.
गार झाल्यावर कढईत जरा जास्त तेलाची फोडणी करुन त्यावर परतून घ्यावेत.

मेथीचे गोळे चवीला फार छान लागतात. लहान मुलांनाही फार आवडतील.
मेथी नसेल तर तुम्ही कसूरी मेथी वापरू शकता.

स्वाती खंदारे
संपादिका, मराठीमाती डॉट कॉम । पुणे
संपादकीय, मराठी लेख, फोटो गॅलरी, पाककला, महाराष्ट्र या आणि अशा विविध विभागांत लेखन.
अधिक माहिती पहा । सर्व लेखन पहा