विमान फिरते अधांतरी - मराठी कविता (गोपीनाथ)

ज्येष्ठ आणि प्रसिद्ध मराठी कवी गोपीनाथ (गोपीनाथ गणेश तळवलकर) यांची विमान फिरते अधांतरी ही लोकप्रिय मराठी कविता.

किती मौज दिसे ही पहा तरी, हे विमान फिरते अधांतरी

---

विमान फिरते अधांतरी - मराठी कविता (गोपीनाथ)

ज्येष्ठ आणि प्रसिद्ध मराठी कवी गोपीनाथ (गोपीनाथ गणेश तळवलकर) यांची विमान फिरते अधांतरी ही लोकप्रिय मराठी कविता.

---

किती मौज दिसे ही पहा तरी
हे विमान फिरते अधांतरी

खोल नदीतुन कापित पाणी
मत्स्य धावतो चहुबाजूंनी
घारच अथवा फिरते गगनी
हुबेहुब हे त्याच परी

रविकररंजित मेघांमधुनी
स्वच्छ चांदण्यामधे पोहुनी
घुमघुम नादे दिशा घुमवुनी
प्रवास करि हे जगावरी

परंतु केव्हा पाऊस गारा
प्रांत वेढुनी टाकिती सारा
त्यातूनही हे जाई भरारा
नवल नव्हे का खरोखरी?

पहा जाऊनी विमानातूनी
दिसेल शोभा अपूर्व वरुनी
डोंगर, राने, ओहळ, तटिनी
आणि कुठे सागरलहरी

ग्रहनक्षत्रे आकाशातील
विमान बघुनी मनात म्हणतील
भेटाया अपणा पृथ्वीतील
येति माणसे कुणीतरी

नको सूर्यचंद्रावर जाया
नको जगाची सफर कराया
नेई विमाना, मज त्या ठाया
जेथं माय मम वास करी

- गोपीनाथ (गोपीनाथ गणेश तळवलकर)