भिल्लाचा पोर - मराठी कविता (गोपीनाथ)

ज्येष्ठ आणि प्रसिद्ध मराठी कवी गोपीनाथ (गोपीनाथ गणेश तळवलकर) यांची भिल्लाचा पोर ही लोकप्रिय मराठी कविता.

उंच उंच डोंगर भवती, चढले नील नभात

---

भिल्लाचा पोर - मराठी कविता (गोपीनाथ)

ज्येष्ठ आणि प्रसिद्ध मराठी कवी गोपीनाथ (गोपीनाथ गणेश तळवलकर) यांची भिल्लाचा पोर ही लोकप्रिय मराठी कविता.

---

उंच उंच डोंगर भवती I चढले नील नभात
भिरभिर वारा व्यापुनिया I टाकी सारा प्रांत

तरुवेलींनी फुललेल्या I त्या खोऱ्यात सुरेख
झुळझुळ वाहे निर्झरिणी I स्फटिकावाणी एक

तोच कुणी चपळाईने I डोंगर वेधुन थोर
करवंदे विकण्यासाठी I ये भिल्लाचा पोर

शाळिग्रामासम काळा I देह कसा घोटीव
तेजदार नागावाणी I दिसे कोवळा जीव

स्वच्छ गोल डोळ्यात नसे I भीतीचा लवलेश
साधा भोळा भाव मुखी I आणि दिसे आवेश

ओठ चिमुकले विलग जरा I होती मधुन मधून
शुभ्र हिरकण्यासम दिसती I दंत किती शोभून

एक करी घेऊनि परशू I दुसऱ्या हाती द्रोण
“करवंदे घ्या करवंदे” I सांगतसे गर्जून

असेल याची पर्णकुटी I जवळच रम्य निवांत
मातापितरांसह तेथे I रहात हा सौख्यांत

स्वातंत्र्याचा खराखुरा I शाहिर आहे हाच
नागरवस्तीचा नाही I या जीवाला जाच

पक्ष्यांची ऐकत गाणी I देत तयाना ताल
हिंडावे रानोरानी I आनंदात खुशाल

घाट सोडुनी कधीच ये I गाडी निघुनी दूर
परि न हले डोळ्यांपुढुनी I तो भिल्लाचा पोर

- गोपीनाथ (गोपीनाथ गणेश तळवलकर)