अनंत तारा - मराठी कविता (बालकवी)

ज्येष्ठ आणि प्रसिद्ध मराठी कवी बालकवी (त्र्यंबक बापूजी ठोंबरे) यांची अनंत तारा ही लोकप्रिय मराठी कविता.

अनंत तारा नक्षत्रे ही अनंत या गगनात

---

अनंत तारा - मराठी कविता (बालकवी)

ज्येष्ठ आणि प्रसिद्ध मराठी कवी बालकवी (त्र्यंबक बापूजी ठोंबरे) यांची अनंत तारा ही लोकप्रिय मराठी कविता.

---

अनंत तारा नक्षत्रे ही अनंत या गगनात
अनंत दीप्ती, अनंत वसुधा, हे शशिसूर्य अनंत
वरती खाली सर्व साठले वातावरण अनंत
माप कशाचे, कुणा मोजिता, सर्व अनंत अनंत

कितेक मानव झटती, करिती हाडाचेही पाणी
अनंत वसुधा आजवरी हो परी मोजिली कोणी
म्हणोत कोणी आम्ही गणिला हा ग्रह हा तारा
परंतु सांगा कुणी मोजिला हा सगळाच पसारा

विशाल वरती गगन नव्हे, हे विश्वाचे कोठार
उदात्ततेचा सागर हा, चिच्छांतीचा विस्तार
कुणी मोजिला, कुणास त्याची लांबीरूंदी ठावी
फार कशाला दिग्वनितांची तरी कुणी सांगावी

अनंत सारे विश्व, जाहले अनंतात या लीन
क्षुद्र मानवा, सांग कशाचा बाळगिसी अभिमान
तव वैभव हे, तुझी धने ही, हे अत्युच्च महाल
जातिल का गगनास भेदूनी? अनंत का होतील?

तुझ्या कीर्तिचे माप गड्या का काळाला मोजील
ज्ञान तुझे तू म्हणशी जाईल, कोठवरी जाईल?
मी, माझे या वृथा कल्पना, तू कोणाचा कोण?
कितेक गेले मी मी म्हणता या चक्री चिरडून

- बालकवी (त्र्यंबक बापूजी ठोंबरे)