तेरड्याचे फुल - मराठी कविता (माधवानुज)

ज्येष्ठ आणि प्रसिद्ध मराठी कवी माधवानुज (डॉ. काशिनाथ हरी मोडक) यांची तेरड्याचे फुल ही लोकप्रिय मराठी कविता.

भाऊ, नवीन बघ हे फुल तेरड्याचे

---

तेरड्याचे फुल - मराठी कविता (माधवानुज)

ज्येष्ठ आणि प्रसिद्ध मराठी कवी माधवानुज (डॉ. काशिनाथ हरी मोडक) यांची तेरड्याचे फुल ही लोकप्रिय मराठी कविता.

---

भाऊ, नवीन बघ हे फुल तेरड्याचे
सौंदर्य यावर किती विलसे मजेचे
हे स्पर्श कोमल किती सुखवी करास
हा लाल रंग रमवी मम लोचनास

मिथ्या न तू सकल जे वदतेस, ताई
हे तेज सुंदर परी टिकणार नाही
त्वा पाहिलेस तिसऱ्या दिवशी फुलास
होशील तू बघुनि त्यास तरी उदास

सौंदर्य वैभव दिसे रमणीय साचे
आहे परी सकल हे धन दो दिसाचे
आणूनि हाच सुविचार मनी विवेकी
जे जाय वैभव लया पडती न शोकी

आता मनात धर एकचि गोष्ट ताई
दैवे जरी तुजसी वैभव थोर येई
मोहात तू पडु नको क्षणही तयाचे
जाऊ नको विसरुनी फुल तेरड्याचे

- माधवानुज (डॉ. काशिनाथ हरी मोडक)