किनारा - मराठी कविता (विद्याधर करंदीकर)

ज्येष्ठ आणि प्रसिद्ध मराठी कवी विद्याधर करंदीकर (विद्याधर सीताराम करंदीकर) यांची किनारा ही लोकप्रिय मराठी कविता.

घननिळ सागराचा घननाद येत कानी

---

किनारा - मराठी कविता (विद्याधर करंदीकर)

ज्येष्ठ आणि प्रसिद्ध मराठी कवी विद्याधर करंदीकर (विद्याधर सीताराम करंदीकर) यांची किनारा ही लोकप्रिय मराठी कविता.

---

घननिळ सागराचा घननाद येत कानी,
घुमती दिशादिशांत लहरीमधील गाणी

चौफेर सूर्यज्वाला, वारा अबोल शांत,
कोठे समुद्रपक्षी गगनी फिरे निवांत

आकाश तेजभारे माडांवरी स्थिरावे,
भटकी चुकार होडी लाडात संथ धावे

वाळूत स्तब्ध झाला रेखाकृती किनारा,
जवळी असून पाणी अतृप्त तो बिचारा

जलधीबरोबरीचे आभासमान नाते,
त्याची न त्यास धरती, संकेत फक्त खोटे

सानिध्य सागराचे, आकाश पांघराया,
परी साथ ना कुणाची अस्तित्व सावराया

- विद्याधर करंदीकर (विद्याधर सीताराम करंदीकर)