प्रिय आईस (मराठी कविता)

प्रिय आईस (मराठी कविता) - मराठीमाती डॉट कॉम चे सभासद कवी उमेश कुंभार यांची आईच्या कविता यातील प्रिय आईस ही कविता.

प्रिय आईस, तू गायलेल्या ओवींचा आवाज अजूनही कानात घुमतो आहे

---

प्रिय आईस (मराठी कविता)

मराठीमाती डॉट कॉम चे सभासद कवी उमेश कुंभार यांची प्रिय आईस ही कविता.

---

प्रिय आईस,
तू गायलेल्या ओवींचा आवाज
अजूनही कानात घुमतो आहे
केसांना झालेला मायेचा स्पर्श अजूनही जाणवतो आहे
तुझ्या मांडीवर डोके ठेवून अजूनही निपचित पडावसं वाटतं
पूर्वी तर वेगळंच होतं
पण तुझं ते रागावणं आता हवहवसं वाटतं
बघ ना आई...
दिवस कसे वेगाने गेले
पण आठवणी आगतिकच आहेत
आता तुझी ती ओवी
तुझ्या मांडीवर निपचित पडलेला मी
आणि केसावरून फिरवलेला तुझा मायेचा हात
दुरावल्यासारखा वाटतोय गं
पण तसं नसावं आई
बहुतेक, याला काळ जबाबदार असावा
मलाही वाटतं,
सारे बंध तोडून तुझ्यापाशी यावं
पुन्हा लहानगं व्हावं
पण सारंच आपल्या हाती नसतं आई
ज्या ज्या वेळी मी घरी येतो
तेव्हा मी तूझा लहानगाच बनून येतो
तुझ्यातले बदल मी टिपत असतो
पण सातत्याने एक गोष्ट जाणवते
जग बदललं, दिवस बदलले
दिवसागणिक माणसंही बदलली
पण तू नाहीस
माझ्यासाठी तू अशी आहेस तशीच आहेस
अन्‌ मी लहानच आहे तुझ्यासाठी
प्रत्येक वेळी मी घर सोडून जाताना
आपण जास्त बोलत नाही
तू शांत असतेस
डोळे पाणावलेले असतात
मी मात्र मिश्किलीचं हसणं दाखवत
घर सोडून जातो
दूर दूर जाताना तुझी प्रतिमा
फिकट फिकट होत जाते
आणि त्याच वेगाने माझे डोळे
पाणवत जातात आई

---

प्रिय आईस (मराठी कविता) संबंधी महत्त्वाचे दुवे:

• तीचं जग (मराठी कविता)
• आई कोण असते? (मराठी कविता)

---

- उमेश कुंभार