तुज करिते औक्षण - मराठी कविता (पद्मा गोळे)

ज्येष्ठ आणि प्रसिद्ध मराठी कवी पद्मा गोळे (पद्मावती विष्णू गोळे) यांची तुज करिते औक्षण ही लोकप्रिय मराठी कविता.

बाळ, चाललासे रणा, घरा बांधिते तोरण

---

तुज करिते औक्षण - मराठी कविता (पद्मा गोळे)

ज्येष्ठ आणि प्रसिद्ध मराठी कवी पद्मा गोळे (पद्मावती विष्णू गोळे) यांची तुज करिते औक्षण ही लोकप्रिय मराठी कविता.

---

बाळ, चाललासे रणा
घरा बांधिते तोरण
पंचप्राणांच्या ज्योतींनीं
तुज करिते औक्षण

याच विक्रमी बाहुंनी
स्वतंत्रता राखायची
खांद्यावरी या विसावे
शांती उद्याच्या जगाची

म्हणूनिया माझ्या डोळा
नाही थेंबही दुःखाचा
मीहि महाराष्ट्रकन्या
धर्मं जाणते विराचा

नाही एकही हुंदका
मुखावाटे काढणार
मीच लावुनी ठेविली
तुझ्या तलवारीस धार

अशुभाची सावलीहि
नाही पडणार येथे
अरे मीहि सांगते ना
जीजा, लक्षुमीशी नाते

तुझ्या शस्त्रांना, अस्त्रांना
शक्ति देईल भवानी
शिवरायांचे स्वरुप
आठवावे रणांगणी

घन्य करी माझी कूस
येई विजयी होऊन
पुन्हा माझिया हाताने
दूधभात भरवीन

- पद्मा गोळे (पद्मावती विष्णू गोळे)