निज रे लडिवाळा - मराठी कविता (भा. रा. तांबे)

ज्येष्ठ आणि प्रसिद्ध मराठी कवी भा. रा. तांबे (भास्कर रामचंद्र तांबे) यांची निज रे लडिवाळा ही लोकप्रिय मराठी कविता.

निज माझ्या छकुल्या चिमण्या राजा, निज रे लडिवाळा

---

निज रे लडिवाळा - मराठी कविता (भा. रा. तांबे)

ज्येष्ठ आणि प्रसिद्ध मराठी कवी भा. रा. तांबे (भास्कर रामचंद्र तांबे) यांची निज रे लडिवाळा ही लोकप्रिय मराठी कविता.

---

जो जो जो जो रे

निज माझ्या छकुल्या चिमण्या राजा
निज रे लडिवाळा
बाळ गुणी, झोप नेली रे कोणी?
जो जो जो बाळा

घरटी ती फांद्यांमधुनी झुलती
निजले चिउकाऊ
निजविती, झुळका गाऊनी गीती
गाणी किती गाऊ

हम्मा ही, दूदू देऊनी पाही
निजली गोठ्यात
रे छबिल्या, राघूमैना निजल्या
अपुल्या पिंजर्‍यात

या वेळीं, निजलीं झाडें वेली;
निजला चांदोबा;
रात्र किती, चढली काळी भवतीं
आला बागुलबा

शुक्क गडे, झाले जिकडे तिकडे
झोप न तुज बाळा
खिंदळशी, खुदुखुदु खुदुखुदु हसशी
एकच हा चाळा

लडिवाळा, रुणुझुण घुंगुरवाळा
पायी वाजविशी
कशी बाळा, झोप शिवेना डोळा?
अफु आली तुजशी

सटवाई, षष्ठिदेवि, जोखाई
सांभाळा याला
न शिवो ते, पाप अमंगल भलते
माझ्या छबिल्याला

- भा. रा. तांबे (भास्कर रामचंद्र तांबे)