बकुळीची फुले - मराठी कविता (ग. ल. ठोकळ)

ज्येष्ठ आणि प्रसिद्ध मराठी कवी ग. ल. ठोकळ (गजानन लक्ष्मण ठोकळ) यांची बकुळीची फुले ही लोकप्रिय मराठी कविता.

छाया गर्द सुरेख गार हिरवी शोभे तुझी पालवी

---

बकुळीची फुले - मराठी कविता (ग. ल. ठोकळ)

ज्येष्ठ आणि प्रसिद्ध मराठी कवी ग. ल. ठोकळ (गजानन लक्ष्मण ठोकळ) यांची बकुळीची फुले ही लोकप्रिय मराठी कविता.

---

छाया गर्द सुरेख गार हिरवी शोभे तुझी पालवी
सो सो गर्जत वाहुनी गदगदा वारा तुला हालवी

भोती कुंपण दाट त्यावरुनही विस्तारल्या डाहळ्या
झाला भूमिवरी किती खच तरी; पाने फुले पाकळ्या

पुष्पांचे झुबके किती लहडले प्रत्येक फांदीवरी
त्यांचा गंध चहूकडे पसरला वर्णू किती माधुरी

छोटे गोंडस पांढरे सुम तुझे हुंगू किती मी तया
छोट्या सुंदर पाकळ्या कितितरी येती न मोजावया

उद्यानात अनंत वृक्ष फुलले त्यांची सुगंधी फुले
घेतो जो न करांत तोच सुकती पस्तावतो त्यामुळे

पुष्पे वेचुनिया तुझी जर तया मी ठेविली गुंफुनी
त्यांचा गंध अनंत काळ टिकतो जाती न कोमेजुनी

पुष्पांच्या तव ओंजळीत तरुवरा डोक्यावरी ठेवितो
यावज्जीव असो शिरावर तुझी छाया असे इच्छितो

- ग. ल. ठोकळ (गजानन लक्ष्मण ठोकळ)