आश्विनशुद्धपक्षी अंबा - नवरातीची आरती

आश्विनशुद्धपक्षी अंबा, नवरातीची आरती - आश्विनशुद्धपक्षी अंबा बैसलि सिंहासनी हो, प्रतिपदेपासून घटस्थापना [Ashwinshuddhapakshi Amba Navratichi Aarti].

आश्विनशुद्धपक्षी अंबा - नवरातीची आरती

देवीच्या आरत्या

आश्विनशुद्धपक्षी अंबा बैसलि सिंहासनी हो ॥ प्रतिपदेपासून घटस्थापना ती करुनी हो ॥ मूलमंत्रजप करुनी भोवते रक्षक ठेउनी हो ॥ ब्रह्माविष्णुरुद्र आईचे पूजन करिती हो ॥ १ ॥ उदो बोला उदो अंबाबाई माउलीचा हो ॥ उदोकारे गर्जती काय महिमा वर्णू तिचा हो ॥ ध्रु. ॥ द्वितीयेचे दिवशी मिळती चौसष्ट योगिनी हो ॥ सकळांमध्ये श्रेष्ठ परशुरामाची जननी हो ॥ कस्तुरीमळवट भांगी शेंदूर भरुनी हो ॥ उदोकारे गर्जती सकल चामुंडा मिळुनी हो ॥ उदो. ॥ २ ॥ तृतीयेचे दिवशी अंबे शृंगार मांडिला हो ॥ मळवट पातळ चोळी कंठी हार मुक्ताफळा हो ॥ कंठींची पदके कांसे पीतांबर पिवळा हो ॥ अष्टभुजा मिरविती अंबे सुंदर दिसे लीला हो ॥ उदो. ॥ ३ ॥ चतुर्थीचे दिवशी विश्वव्यापक जननी हो ॥ उपासका पाहसी अंबे प्रसन्न अंतःकरणी हो ॥ पूर्णकृपे पाहसी जगन्माते मनमोहिनी हो ॥ भक्तांच्या माउली सुर ते येती लोटांगणी हो ॥ उदो. ॥ ४ ॥ पंचमीचे दिवशी व्रत ते उपांगललिता हो ॥ अर्थ्यपाद्यपूजने तुजला भवानी स्तविती हो ॥ रात्रीचे समयी करिती जागरण हरिकथा हो ॥ आनंदे प्रेम ते आले सद्भावे क्रीडता हो ॥ उदो. ॥ ५ ॥ षष्ठीचे दिवशी भक्ता आनंद वर्तला हो ॥ घेउनि दिवट्या हस्ती हर्षे गोंधळ घातला हो ॥ कवडी एक अर्पिता देसी हार मुक्ताफळा हो ॥ जोगवा मागता प्रसन्न झाली भक्तकुळा हो ॥ उदो. ॥ ६ ॥ सप्तमीचे दिवशी सप्तश्रृंगगडावरी हो ॥ तेथे तू नांदसी भोवतीं पुष्पे नानापरी हो ॥ जाईजुईशेवंती पूजा रेखियली बरवी हो ॥ भक्त संकटीपडता झेलुनि घेसी वरचेवरी हो ॥ उदो. ॥७ ॥ अष्टमीचे दिवशी अष्टभुजा नारायनी हो ॥ सह्याद्रीपर्वती पाहिली उभी जगज्जननी हो ॥ मन माझें मोहिले शरण आलो तुजलागुनी हो ॥ स्तनपान देउनि सुखी केले अंतःकरणी हो ॥ उदो. ॥ ८ ॥ नवमीचे दिवशी नवदिवसांचे पारणे हो ॥ सप्तशतीजप होमहवने सद्भक्ती करुनी हो ॥ षड्रस‍अन्ने नैवेद्यासी अर्पियली भोजनी हो ॥ आचार्यब्राह्मणा तृप्त केले कृपेकरुनी हो ॥ उदो. ॥ ९ ॥ दशमीच्या दिवशी अंबा निघे सीमोल्लंघनी हो ॥ सिंहारूढे दारुण शस्त्रे अंबे त्वा घेउनी हो ॥ शुंभनिशुंभादिक राक्षसा किती मारिसी रणी हो ॥ विप्रा रामदासा आश्रय दिधला तो चरणी हो । उदो. ॥ १० ॥

देवीच्या इतर आरत्या वाचा: