गवतफुला रे (मराठी कविता)

गवतफुला रे - (मराठी कविता) ज्येष्ठ आणि प्रसिद्ध मराठी कवयित्री इंदिरा संत यांची लोकप्रिय कविता गवतफुला रे.

रंगरंगुल्या, सानसानुल्या, गवतफुला रे गवतफुला

---

गवतफुला रे (मराठी कविता)

ज्येष्ठ प्रसिद्ध कवयित्री इंदिरा संत यांची लोकप्रिय कविता गवतफुला रे.

---

रंगरंगुल्या, सानसानुल्या
गवतफुला रे गवतफुला
असा कसा रे मला लागला
सांग तुझा रे तुझा लळा

मित्रासंगे माळावरती
पतंग उडवित फिरताना
तुला पाहिले गवतावरती
झुलता झुलता हसताना

विसरुनी गेलो, पतंग नभीचा
विसरुन गेलो मित्रांना
पाहुन तुजला हरखुन गेलो
अशा तुझ्या रे रंगकळा

हिरवी नाजुक, रेशिम पाती
दोन बाजुला सळसळती
नीळनिळुली एक पाकळी
पराग पिवळे झगमगती

तळी पुन्हा अन्‌ गोजीरवाणी
लाल पाकळी खुलते रे
उन्हामध्ये हे रंग पाहता
भानच हरपुनी गेले रे

पहाटवेळी आभाळ येते
लहान होऊनी तुझ्याहुनी
तुला भरविते निळ्या करांनी
दवमोत्यांची कणी कणी

वारा घेऊनी रूप सानुले
खेळ खेळतो झोपाळा
रात्रही इवली होऊन म्हणते
अंगाईचे गीत तुला

गोजिरवाणा हो रविचा कणा
छाया होते इवलीशी
तुझ्या संगती लपून खेळते
रमून जाते पहा कशी

मलाही वाटे लहान होऊन
तुझ्याहुनही लहान रे
तुझ्या संगती सडा रहावे
विसरुन शाळा, घर सारे

आभाळाशी हट्ट करावा
खाऊ खावा तुझ्यासवे
तुझे घालुनि रंगीत कपडे
फुलपाखरां फसवावे

---

इंदिरा संत यांच्या इतर प्रसिद्ध कविता:

• अक्कू बक्कू - मराठी कविता (इंदिरा संत)
• ऋतुराजाची चाहूल - मराठी कविता (इंदिरा संत)
• पाणी पाणी - मराठी कविता (इंदिरा संत)
• नको नको रे पावसा (मराठी कविता)
• या हो सुर्यनारायणा (मराठी कविता)

---

- इंदिरा संत