या हो सुर्यनारायणा (मराठी कविता)

या हो सुर्यनारायणा - (मराठी कविता) ज्येष्ठ आणि प्रसिद्ध मराठी कवयित्री इंदिरा संत यांची लोकप्रिय कविता या हो सुर्यनारायणा.

या हो सुर्यनारायणा, या हो या लौकर

---

या हो सुर्यनारायणा (मराठी कविता)

ज्येष्ठ प्रसिद्ध कवयित्री इंदिरा संत यांची लोकप्रिय कविता या हो सुर्यनारायणा.

---

या हो सुर्यनारायणा
या हो या लौकर
सोन्याच्या पावलांनी
भूषवा हे घर

अंगण सारवीले
रेखिले स्वस्तिक
हळदी-कुंकवानी
मंगलसूचक

उघडी दालने ही
स्वागता आतुर
या हो सुर्यनारायणा
या हो या लौकर

आकाशाच्या मध्यभागी
आलात भास्करा
तेजाच्या वर्षावात
झगमगे धरा

येऊ देत माझ्या घरी
किरणांचे झोत
तेजस्वी पित्याचे ते
वात्सल्याचे हात

उघडी तावदाने
झरोके कौलारी
रेंगाळोत घरामाजी
किरणे रुपेरी

सोन्याच्या वेशीतून
निरोप घेताना
या हो या अंगणात
सूर्यनारायणा

आईच्या मायेहून
कोमल करांनी
गोंजारा बालकांना
खेळती अंगणी

रंगवा तावदान
शिणले अंतर
गुलाबी आनंदात
न्हाऊ दे संसार

---

इंदिरा संत यांच्या इतर प्रसिद्ध कविता:

• अक्कू बक्कू - मराठी कविता (इंदिरा संत)
• ऋतुराजाची चाहूल - मराठी कविता (इंदिरा संत)
• पाणी पाणी - मराठी कविता (इंदिरा संत)
• नको नको रे पावसा (मराठी कविता)
• गवतफुला रे (मराठी कविता)

---

- इंदिरा संत