सीतामाई त्यागमाता - भोंडला गीते (डॉ. मिलिंद खांडवे)

सीतेच्या जीवनकथेच्या माध्यमातून श्रद्धा, त्याग आणि विवेकाचे महत्त्व अधोरेखित करणारे मराठीमाती डॉट कॉमचे सभासद कवी डॉ. मिलिंद खांडवे यांचे भोंडला गीत.

सीतेच्या जीवनकथेच्या माध्यमातून श्रद्धा, त्याग आणि विवेकाचे महत्त्व अधोरेखित करणारे भोंडला गीत...

सीतामाई त्यागमाता

डॉ. मिलिंद खांडवे (नाशिक, महाराष्ट्र)

हे भोंडला गीत सीतेच्या जीवनप्रवासातून मिळणाऱ्या नैतिक व आध्यात्मिक शिकवणीचे लोकभावनेतून केलेले प्रभावी चित्रण आहे. सीतेला धरतीमाता मानून तिच्या त्याग, पावित्र्य आणि भोळेपणावर प्रकाश टाकला आहे. रामायणातील वनवास, पंचवटी, सुवर्णमृग आणि लक्ष्मणरेषा या प्रसंगांतून स्त्रीची श्रद्धा, विश्वास आणि त्यातून उद्भवणारा धोका अधोरेखित होतो. शेवटी, गीतात सीतेच्या कथेतून बोध घेत आजच्या काळात विवेक, सावधपणा आणि सीमांचे भान ठेवण्याचा सामाजिक संदेश दिला आहे.

भुलाबाई भुलाबाई, येग येग आमच्या घरी. नांदे प्रेम, सौख्य, स्वास्थ्य, आमच्या ग घरी-दारी. आज ऐक सांगतो, “धैर्यधन्वी” ची गोष्ट खास. ज्ञानाचा तू दीप ग, दे साऱ्यास प्रकाश. फुलांच्या रांगोळीत लिहिलं “सीतेमाई” नाव. माझ्या गाण्यात भर तू, “सत्यधैर्य” असा भाव. आमची ग सीतेमाय, माय तुझी धरणी. आम्ही साऱ्या करतो वंदन तुझ चरणी. जनकाची तू लेक ग, घुटीत आध्यात्म. स्वयंवर होता, जग झाले राम ग. अयोध्येत वास, नाही आला रास. झाला वनवास, पंचवटी निवास. गोदेतीरी दिसला सुवर्ण मृग छान. सीते जैस्या सतीचा, सुटला ग भान. पर्णकुटीत ऐकली रामाची आरोळी. देवाची ती देवी, कशी झाली भोळी. दुष्ट दशानन आला, साधू रूप घेऊनी. बुद्धी भ्रष्ट झाली, लक्ष्मणरेषा ओलांडूनी. भुलाबाई सखुबाई, पार्वती आई यावे. लक्ष्मणरेषेचं भान, आम्ही आता ठेवावे.

डॉ. मिलिंद खांडवे यांचे इतर लेखन वाचा: