येवढे द्यावे - मराठी कविता (लक्ष्मीकांत तांबोळी)

ज्येष्ठ आणि प्रसिद्ध मराठी कवी लक्ष्मीकांत तांबोळी यांची येवढे द्यावे ही लोकप्रिय मराठी कविता.

अनंता येवढे द्यावे, फुलांचे रंग ना जावे

---

येवढे द्यावे - मराठी कविता (लक्ष्मीकांत तांबोळी)

ज्येष्ठ आणि प्रसिद्ध मराठी कवी लक्ष्मीकांत तांबोळी यांची येवढे द्यावे ही लोकप्रिय मराठी कविता.

---

अनंता येवढे द्यावे, फुलांचे रंग ना जावे
उडाया पाखरांसाठी, जरा आभाळ ठेवावे

घराला उंबरा राहो, पेटती राहू दे चूल
कुण्याही मायपदराशी खेळते राहू दे मूल

फुलांचा भार ना व्हावा, कधीहि कोणत्या देठा
चालत्या पावलांसाठी, असू दे मोकळ्या वाटा

तान्हुल्या बाळ ओठांचा, तुटो ना दे कधी पान्हा
असू दे माय कोणाची, असू दे कोणता तान्हा

चालता तिमिरवाटेने, सोबती चांदणे यावे
घणांचे घाव होताना, फुलांनी सांत्वना द्यावे

कितीही पेटू दे ज्वाळा, जळाचा जाळ न व्हावा
बरसत्या थेंबथेंबांचा, भुईतुन कोंब उगवावा

अनंता येवढे द्यावे, भुईचे अंग मी व्हावे
शेवटी श्वास जाताना, फुलांचे रंग मी व्हावे

- लक्ष्मीकांत तांबोळी