भय इथले संपत नाही - मराठी कविता (कवी ग्रेस)

ज्येष्ठ आणि प्रसिद्ध मराठी कवी कवी ग्रेस (माणिक सीताराम गोडघाटे) यांची भय इथले संपत नाही ही लोकप्रिय मराठी कविता.

भय इथले संपत नाही, झाडांची हलती पाने

---

भय इथले संपत नाही - मराठी कविता (कवी ग्रेस)

ज्येष्ठ आणि प्रसिद्ध मराठी कवी कवी ग्रेस (माणिक सीताराम गोडघाटे) यांची भय इथले संपत नाही ही लोकप्रिय मराठी कविता.

---

भय इथले संपत नाही, मज तुझी आठवण येते
मी संध्याकाळी गातो, तू मला शिकविली गीते

हे झरे चंद्रसजणांचे, ही धरती भगवी माया
झाडांशी निजलो आपण, झाडात पुन्हा उगवाया

त्या वेली नाजूक भोळ्या, वार्‍याला हसवून पळती
क्षितिजांचे तोरण घेऊन, दारावर आली भरती

तो बोल मंद हळवासा, आयुष्य स्पर्शुनी गेला
सीतेच्या वनवासातील जणू अंगी राघव शेला

देऊळ पलिकडे तरीही, तुज ओंजळ फुटला खांब
थरथरत्या बुबूळांपाशी, मी उरलासुरला थेंब

संध्येतील कमळासम, मी नटलो श्रृंगाराने
देहाच्या भवती रिंगण, घालती निळाईत राने

स्त्रोत्रात इंद्रिये अवघी, गुणगुणती दुःख कुणाचे
हे सरता संपत नाही, चांदणे तुझ्या स्मरणाचे

ते धुके अवेळी होते, की परतायाची घाई
मेंदुतून ढळली माझ्या, निष्पर्ण तरुंची राई

- कवी ग्रेस (माणिक सीताराम गोडघाटे)