वेडं कोकरू - मराठी कविता

वेडं कोकरू, मराठी कविता - [Veda Kokaru, Marathi Kavita] देताना कधीच नी कसलाच,विचार केला नाही, तर, मग परतफेडीत प्रेमाचा हक्क, का सोडता आला नाही!?.
वेडं कोकरू - मराठी कविता | Veda Kokaru - Marathi Kavita

देताना कधीच नी कसलाच,विचार केला नाही, तर, मग परतफेडीत प्रेमाचा हक्क, का सोडता आला नाही!?

देताना कधीच नी कसलाच
विचार केला नाही, तर
मग परतफेडीत प्रेमाचा हक्क
का सोडता आला नाही!?

त्यांचं असो वा नसो,
प्रेमात फरक का तो पडावा?
दाणा पाण्यासाठी बसणाऱ्या पाखरावर
कुणी हक्क तरी कसा सांगावा?

येतात ती भुकेसाठी,
जातात नवी तहान घेऊन
एक भागली, तर पुढची लगेच
बोलावू लागते आशा उमलवून

त्यांची आस पहावी,
की आपली ऊतू द्यावी?
अखंड ओतणाऱ्या धरणी मायेनं
का माझी कीव करावी?

माया मुळी अशीच खाशी,
सोबत मोफत येणारी!
न मागता, न ठरवता,
जिथे तिथे उचंबळणारी!

कसा घालावा बांध तिला
कुठवरचा काळ ठरवावा
खळखळणाऱ्या निर्झराला
कालव्यांनी का थांबवावा!?

बोल की गं माये
ही माया कशी मोजू?
तुला पाहुन शिकत नाही
कसं हे वेडं कोकरू?


प्रज्ञा वझे-घारपुरे | Pradnya Vaze-Gharpure
बंगळूर, कर्नाटक (भारत) । सभासद, मराठीमाती डॉट कॉम
बिझीनेस मॅनेजमेंट विषयात पदविधर असलेल्या प्रज्ञा यांना लहान मुंलांविषयीच्या लेखनात रस आहे त्यावर त्यांची काही पुस्तके देखील प्रकाशित झालेली आहेत.

टिप्पणी पोस्ट करा

स्पॅम टिप्पण्या टाळण्यासाठी, सर्व टिप्पण्या प्रदर्शित करण्यापूर्वी नियंत्रित केल्या जातात.