माझ्या माहेरची वाट - मराठी कविता

माझ्या माहेरची वाट, मराठी कविता - [Majhya Maherachi Vaat, Marathi Kavita] आज खुणावते मला, माझ्या माहेरची वाट.

आज खुणावते मला, माझ्या माहेरची वाट

आज खुणावते मला
माझ्या माहेरची वाट
दृष्ट लागोना कुणाची
आणि सुखा गालबोट

माझ्या माहेरची वाट
जसा झरोका मायेचा
आनंदाच्या वनामध्ये
कल्पवृक्ष हा छायेचा

माझ्या माहेरची वाट
वाट डोंगराएवढी
कृष्ण माझा बंधुराया
त्याची माया गं केवढी

माझ्या माहेरच्या घरी
उभी दारात वहिनी
भाऊ माझा भाग्यवान
अशी लाभाया सजणी

माझ्या माहेरची वाट
काय वर्णू थाटमाट
सारा मायेचा पसारा
त्याची गोडी शब्दातीत


अजित पाटणकर | Ajit Patankar
सभासद, मराठीमाती डॉट कॉम
बालपणापासून काव्यलेखनाची आवड असणारे बडोदा, गुजरात येथील अजित पाटणकर हे मराठीमाती डॉट कॉम येथे मराठी कविता या विभागात लेखन करतात.

1 टिप्पणी

  1. मी एक कवी। परी नाही वीक। अंधाराकडूनी प्रकाशाकडे झेप परी घेतो।...विजय बोचरे 9325449063
स्पॅम टिप्पण्या टाळण्यासाठी, सर्व टिप्पण्या प्रदर्शित करण्यापूर्वी नियंत्रित केल्या जातात.