जोडण्यासारखं बरंच आहे - मराठी कविता

जोडण्यासारखं बरंच आहे, मराठी कविता - [Jodanyasarakha Barach Aahe, Marathi Kavita] नाही करता आलं तरी, करण्यासारखं बरंच आहे.
जोडण्यासारखं बरंच आहे - मराठी कविता | Jodanyasarakha Barach Aahe - Marathi Kavita

नाही करता आलं तरी, करण्यासारखं बरंच आहे

नाही करता आलं तरी
करण्यासारखं बरंच आहे
तोडलेलं असलं तरी
जोडण्यासारखं बरंच आहे

प्रेम करा खुल्लम खुल्ला
बाळगु नका कसलीच भिस्त
आजी आजोबांच्याच काळात
शोभत होती त्यांची शिस्त

माणुसकीच्या बाजारात
घेण्यासारखं बरंच आहे
तोडलेलं असलं तरी
जोडण्यासारखं बरंच आहे

गोळा करून पुष्कळ धन
काय शेवटी फायदा होतो
चार खांदे एक तिरडी
इतकाच काय तो वायदा होतो

आलो एका थेंबातून
नि राखेमध्ये घरंच आहे
तोडलेलं असलं तरी
जोडण्यासारखं बरंच आहे

म्हणून म्हणतो जगता जगता
आयुष्याचं ठेवा भान
स्वतःबरोबर दुसऱ्याच्याही
अस्तित्वाचा राखा मान

व्यक्ती वल्ली लोप पावते
सगळं कीर्तीवरच आहे
तोडलेलं असलं तरी
जोडण्यासारखं बरंच आहे


अजित पाटणकर | Ajit Patankar
सभासद, मराठीमाती डॉट कॉम
बालपणापासून काव्यलेखनाची आवड असणारे बडोदा, गुजरात येथील अजित पाटणकर हे मराठीमाती डॉट कॉम येथे मराठी कविता या विभागात लेखन करतात.

टिप्पणी पोस्ट करा

स्पॅम टिप्पण्या टाळण्यासाठी, सर्व टिप्पण्या प्रदर्शित करण्यापूर्वी नियंत्रित केल्या जातात.