अक्काबाईची आराधना - चातुर्य कथा

अक्काबाईची आराधना, चातुर्य कथा - [Akkabaichi Aradhana, Chaturya Katha] अक्काबाईची(अवदसा) आराधना करून चतुर गरीब माणासाने काय मागीतले असावे?
अक्काबाईची आराधना - चातुर्य कथा | Akkabaichi Aradhana - Chaturya Katha

अक्काबाईची(अवदसा) आराधना करून चतुर गरीब माणासाने काय मागीतले असावे?

एका गृहस्थाची परिस्थिती अगदीच बेताची होती. त्याला एका अधिकारी सत्पुरुषाकडून लक्ष्मीला, त्याचप्रमाणे दारिद्रयाची देवता अवदसा हिला प्रसन्न करुन घेण्याचे असे दोन प्रभावी मंत्र मिळाले.

तो गृहस्थ लक्ष्मीच्या मंदिरात गेला, पण तिला प्रसन्न करुन घेण्यासाठी तिची प्रार्थना करायला आलेल्या लोकांची तिथे एवढी झुंबड उडाली होती की, बराच प्रयत्न करुनही त्याला त्या मंदिरात प्रवेश मिळेना.

तितक्यात त्याचं लक्ष जवळच असलेल्या अवदसेच्या मंदिराकडे गेलं. ते मंदीर पाहताच त्याच्या मनात एक वेगळीच कल्पना चमकली व त्याची पावले त्या मंदिराकडे वळली.

त्या मंदीरात शुकशुकाट होता. गाभाऱ्यात असलेल्या मुर्तीपुढे त्याने अनुष्ठान सुरु केले व ते संपताच त्याने तिला प्रसन्न करुन घेण्याचा प्रभावी मंत्र म्हटला. त्याबरोबर प्रकट होऊन तिनं त्याला विचारलं, “ओळखलंस का तू मला? मी अवदसा उर्फ अक्काबाई आहे. माझी आराधना करुन, मला प्रसन्न करु पाहणारा तू पहिलाच माणूस आहेस. बोल, तुला काय हवंय? आहे त्यापेक्षा अधिक दारिद्रय हवं की दुर्बुध्दी हवी? की व्यसनाधीनता हवी? यापैकी तू मागशील ते मी देईन.”

यावर तो गरीब चतूर माणूस हात जोडून तिला म्हणाला, “हे अवदसे! तुझी किंचीतही दॄष्टी माझ्यावर किंवा माझ्या वंशजावर पडू नये, एवढेच माझे तुजकडे मागणे आहे.”

अवदसा शब्दात अडकून गेली होती, तिला त्या गृहस्थाचं मागणं मान्य करावं लागलं. पण त्यामुळे त्या गृहस्थाच्या घरातलं दारिद्रय जाऊन त्याची परिस्थिती भराभर सुधारु लागली.


मराठीमाती | MarathiMati
संपादक मंडळ, मराठीमाती डॉट कॉम
मराठीमाती डॉट कॉम वरिल विविध विभागांत लेखन आणि संपादन.

टिप्पणी पोस्ट करा

स्पॅम टिप्पण्या टाळण्यासाठी, सर्व टिप्पण्या प्रदर्शित करण्यापूर्वी नियंत्रित केल्या जातात.