घर एक इवलसं - मराठी कविता

घर एक इवलसं, मराठी कविता - [Ghar Ek Ivalasa, Marathi Kavita] घर एक इवलसं, प्रेमाने थाटलेलं, सुख - दुःख सगळं काही एकत्र वाटलेलं.

घर एक इवलसं, प्रेमाने थाटलेलं, सुख - दुःख सगळं काही एकत्र वाटलेलं

घर एक इवलसं, प्रेमाने थाटलेलं
सुख-दुःख सगळं काही एकत्र वाटलेलं

घर एक इवलसं, प्रीती फुलांनी नटलेलं
नागमोडी वाटेवर एका वळणावर भेटलेलं

घर एक इवलसं, सुगरणीनं विणलेलं
विहिरीच्या संथ पाण्यावर टांगलेलं

घर एक इवलसं, मायेची ऊब दाटवलेलं
काडी-काडी एकमेकांसवे आधाराने साठवलेलं

घर एक इवलसं, अखंड तेज तेवलेलं
चिवचिवणार्‍या चोचीत रोज एक दाणा ठेवलेलं

घर एक इवलसं, विळख्यात काळाच्या हरवलेलं
पुन्हा पुन्हा मनाच्या वाळूत आठवणीनं गिरवलेलं

टिप्पणी पोस्ट करा

स्पॅम टिप्पण्या टाळण्यासाठी, सर्व टिप्पण्या प्रदर्शित करण्यापूर्वी नियंत्रित केल्या जातात.