भगव्या हिरव्या निळ्या टोप्या चढवलेले - मराठी कविता

भगव्या हिरव्या निळ्या टोप्या चढवलेले, मराठी कविता - [Bhagavya Hiravya Nilya Topya Chadhavlele, Marathi Kavita] मेंदू पसरलेत सगळीकडे.
भगव्या हिरव्या निळ्या टोप्या चढवलेले - मराठी कविता | Bhagavya Hiravya Nilya Topya Chadhavlele - Marathi Kavita

भगव्या, हिरव्या, निळ्या टोप्या चढवलेले, मेंदू पसरलेत सगळीकडे

भगव्या, हिरव्या, निळ्या टोप्या चढवलेले
मेंदू पसरलेत सगळीकडे
एक टोपी रंग नसलेली
कुणी माझ्याकडेही फेका
मला पाऊस खूप लागतोय...

घराघरात पिझ्झा पोचवणारे
तुमची हौस भागवतीलही
ज्वारीचा एखादा दाणा
कुणी माझ्या शेतातही फेका
मला भूक खूप लागलीये...

त्या बंद पडलेल्या शाळेच्या जागी
लख्ख उजेडाचा मॉल दिसतोय
गेट वे ऑफ इंडियावर जळणारी एखादी मेणबत्ती
कुणी माझ्या झोपडीतही पेटवा
मला भीती खूप वाटतेय...

इथल्या झोपड्या अन्‌ शेती हिसकावून
अडाणी लोकांनी इमले बांधलेत
वाचलेली झोपडी झाकण्यासाठी
एखादं छप्पर माझ्याकडेही फेका
माझी झोपडी खूप खचलेय...

- यशपाल कांबळे

टिप्पणी पोस्ट करा

स्पॅम टिप्पण्या टाळण्यासाठी, सर्व टिप्पण्या प्रदर्शित करण्यापूर्वी नियंत्रित केल्या जातात.