फिरी येता परतुनी - मराठी कविता

फिरी येता परतुनी, मराठी कविता [Phiri Yeta Partuni, Marathi Kavita] - ओढीने घरट्याच्या, उडे पाखरू सांजेला.
फिरी येता परतुनी - मराठी कविता | Phiri Yeta Partuni - Marathi Kavita
नोकरी निमित्त आपली आई आणि गावापासून दूर असलेल्या मुलाला आपल्या आई विषयी वाटणारी ओढ आणि त्याच्या मनाची व्याकुळता व्यक्त करणारी कविता म्हणजेच ‘फिरी येता परतुनी’.

ओढीने घरट्याच्या
उडे पाखरू सांजेला
मन धावे तुझ्याकडे
कुशी घे ग लेकराला

ढोरं कष्ट उपसुन
जीव थकला भागला
न्हाऊ माखु घाल मज
डोळे आले हे निजेला

मागे लागुन सुखाच्या
जरी गाव मी सोडला
क्षणभर ना मला
तुझा विसर पडला

व्याकुळला जीव माझा
आई तुझ्या ग भेटीला
आठवाने तुझ्या आज
गळा माझा ग दाटला

घाम गाळुन बहुत
जरी पैका हा साठला
कागदाच्या तुकड्याने
लेक आईला मुकला

वाटे सगळे सोडुन
गाव आपला गाठावा
सेवा करताना तुझी
देह मातीत मिळावा

दिस सुखाचे दावण्या
लेक परतून आला
पुरे झाले ते राबणे
थोडा घे आता विसावा
थोडा घे आता विसावा




केदार कुबडे | Kedar Kubade
सभासद, मराठीमाती डॉट कॉम
मराठी कथा, मराठी भयकथा, मराठी कविता या आणि अशा विविध विभागांत लेखन.

टिप्पणी पोस्ट करा

स्पॅम टिप्पण्या टाळण्यासाठी, सर्व टिप्पण्या प्रदर्शित करण्यापूर्वी नियंत्रित केल्या जातात.