महाराष्ट्र गीत - मराठी कविता (श्रीपाद कोल्हटकर)

ज्येष्ठ आणि प्रसिद्ध मराठी कवी श्रीपाद कोल्हटकर (श्रीपाद कृष्ण कोल्हटकर) यांची महाराष्ट्र गीत ही लोकप्रिय मराठी कविता.

बहु असोत सुंदर संपन्न की महा

---

महाराष्ट्र गीत - मराठी कविता (श्रीपाद कोल्हटकर)

ज्येष्ठ आणि प्रसिद्ध मराठी कवी श्रीपाद कोल्हटकर (श्रीपाद कृष्ण कोल्हटकर) यांची महाराष्ट्र गीत ही लोकप्रिय मराठी कविता.

---

बहु असोत सुंदर संपन्न की महा
प्रिय अमुचा एक महाराष्ट्र देश हा

गगनभेदि गिरिविण अणु नच तिथे उणे
आकांक्षापुढति जिथे गगन ठेंगणे
अटकेवरि जेथील तुरंगि जल पिणे
तेथ अडे काय जलाशय न दाविणे?
पौरुषासी अटक गमे जेथ दु:सहा

प्रासाद कशास जेथ हृदयमंदिरे
सद्भावांचीच भव्य दिव्य आगरे
रत्ना वा मौक्तिकाहि मूल्य मुळी नुरे
रमणीची कूस जिथे नृमणिखनि ठरे
शुद्ध तिचे शीलहि उजळवि गृहा गृहा

नग्न खड्ग करि, उघडे बघुनि मावळे
चतुरंग चमूचेही शौर्य मावळे
दौडत चहुकडुनि जवे स्वार जेथले
भासति शतगुणित जरी असति एकले
यन्नामा परिसुनि रिपु शमितबल अहा

विक्रम वैराग्य एक जागि नांदती
जरिपटका भगवा झेंडाहि डोलती
धर्म-राजकारण समवेत चालती
शक्तियुक्ति एकवटुनि कार्य साधिती
पसरे यत्कीर्ति अशी विस्मयावहा

गीत मराठ्यांचे श्रवणी मुखी असो
स्फूर्ति दीप्ति धृतिहि देत अंतरी ठसो
वचनि लेखनीहि मराठी गिरा दिसो
सतत महाराष्ट्रधर्म मर्म मनि वसो
देह पडो तत्कारणि ही असे स्पृहा

- श्रीपाद कोल्हटकर (श्रीपाद कृष्ण कोल्हटकर)