एसएनडीटीत ‘संस्कृता दिवाळी मेळा’ उत्साहात संपन्न

0 0 संपादक ४ नोव्हें, २०२६ संपादन

एस.एन.डी.टी. महिला विद्यापीठ पुणे येथे विद्यार्थिनींच्या उद्योजकीय कौशल्यांना प्रोत्साहन देणारा ‘संस्कृता दिवाळी मेळा २०२६’ उत्साहात संपन्न.

एस.एन.डी.टी. महिला विद्यापीठाच्या पुणे कॅम्पसमध्ये विद्यार्थिनींच्या उद्योजकीय कौशल्यांना वाव देणारा ‘संस्कृता दिवाळी मेळा २०२६’ अत्यंत उत्साहात पार पडला…

एसएनडीटीत ‘संस्कृता दिवाळी मेळा’ उत्साहात संपन्न

स्वाती खंदारे (मराठीमाती डॉट कॉमच्या सह-संपादिका आणि छायाचित्रकार)

ठळक मुद्दे

एसएनडीटी कला व वाणिज्य महाविद्यालय आणि गृहविज्ञान महाविद्यालयाच्या संयुक्त विद्यमाने दोन दिवसीय दिवाळी मेळ्याचे आयोजन करण्यात आले.
मेळ्यात विद्यार्थिनींनी ६८ स्टॉल्स उभारून दिवाळी सजावट, खाद्यपदार्थ, हस्तकला व फॅशन उत्पादनांची यशस्वी विक्री केली.
प्र-कुलगुरू व कुलसचिव प्रा. विलास नांदवडेकर आणि उद्योजक अजय पुरोहित यांच्या प्रमुख उपस्थितीत हा सोहळा संपन्न झाला.
या उपक्रमामुळे विद्यार्थिनींना प्रत्यक्ष बाजारातील अनुभव, ग्राहक संवाद व व्यवसाय व्यवस्थापनाचे मोलाचे धडे मिळाले.

पुणे: विद्यार्थिनींमध्ये उद्योजकीय दृष्टिकोन, आत्मविश्वास आणि व्यावसायिक निर्णयक्षमता विकसित करण्यासाठी एस.एन.डी.टी. कला आणि वाणिज्य महिला महाविद्यालय (स्वायत्त) तसेच एस.एन.डी.टी. गृहविज्ञान महिला महाविद्यालय, पुणे यांच्या संयुक्त विद्यमाने आयोजित ‘संस्कृता दिवाळी मेळा २०२६’ अत्यंत उत्साहात पार पडला. ३० आणि ३१ ऑक्टोबर २०२६ दरम्यान महर्षी कर्वे विद्या विहार, कर्वे रोड, पुणे येथे या दोन दिवसीय उपक्रमाचे आयोजन करण्यात आले होते.

विद्यापीठाच्या ‘संस्कृता – पराशक्ती’ या मूळ संकल्पनेला अनुसरून तरुण विद्यार्थिनींना केवळ पुस्तकी ज्ञान न देता प्रत्यक्ष बाजारातील आव्हाने, ग्राहक संवाद आणि व्यवसाय व्यवस्थापनाचा अनुभव देणे, हा या मेळ्याचा मुख्य उद्देश होता. या कार्यक्रमाची संकल्पना एस.एन.डी.टी. कला आणि वाणिज्य महिला महाविद्यालयाचे प्राचार्य प्रा. भरत व्हनकटे यांच्याकडून लाभली असून, प्रा. गणेश चव्हाण (प्राचार्य, एस.एन.डी.टी. गृहविज्ञान महिला महाविद्यालय, पुणे) यांच्या सहकार्याने याचे संयुक्त आयोजन करण्यात आले होते.

उद्घाटन सोहळ्यास प्र-कुलगुरू व कुलसचिव प्रा. विलास नांदवडेकर, ओंकार इंजिनिअरिंगचे संस्थापक व प्रमुख पाहुणे श्री. अजय पुरोहित, एस.एन.डी.टी. महिला विद्यापीठ सिनेट सदस्य श्री. सुरेंद्र निरगुडे, पदव्युत्तर समन्वयक प्रा. सचिन देवरे, डॉ. रवींद्र हांडे, डॉ. रोहिणी भोईटे, स्वाती गच्चे यांच्यासह शिक्षक व विद्यार्थिनी मोठ्या संख्येने उपस्थित होत्या. उद्योजक श्री. अजय पुरोहित यांनी विद्यार्थ्यांना उद्योजकतेचे महत्त्व, व्यावसायिक संधी आणि नाविन्यपूर्ण कल्पनांच्या यशस्वी रूपांतराविषयी मार्गदर्शन केले.

या मेळ्यात विद्यार्थिनींनी एकूण ६८ उपक्रमशील स्टॉल्स उभारले होते. यात दिवाळी विशेष सजावट, हस्तकला, घरगुती खाद्यपदार्थ, बेकरी उत्पादने, फॅशन व सौंदर्य सेवांचा समावेश होता. दोन दिवसांत परिसरातील नागरिक, पालक व प्राध्यापकांसह सुमारे ८५० हून अधिक उपस्थितांनी भेट देऊन विद्यार्थिनींचा उत्साह वाढवला. सैद्धांतिक ज्ञानाला प्रत्यक्ष व्यवहाराची जोड देणारा हा मेळा विद्यार्थिनींना भविष्यात स्वतःचे स्वतंत्र उद्योग सुरू करण्यासाठी आणि आत्मनिर्भर बनण्यासाठी अत्यंत मार्गदर्शक ठरला.