चुकलेले कोकरू - मराठी कविता (वि. दा. सावरकर)

ज्येष्ठ आणि प्रसिद्ध मराठी कवी वि. दा. सावरकर (विनायक दामोदर सावरकर) यांची चुकलेले कोकरू ही लोकप्रिय मराठी कविता.

का भटकसि येथे बोले

---

चुकलेले कोकरू - मराठी कविता (वि. दा. सावरकर)

ज्येष्ठ आणि प्रसिद्ध मराठी कवी वि. दा. सावरकर (विनायक दामोदर सावरकर) यांची चुकलेले कोकरू ही लोकप्रिय मराठी कविता.

---

का भटकसि येथे बोले l का नेत्र जाहले ओले
कोणी का तुला दुखवीले l सांग रे!

धनि तुझा क्रूर की भारी l का माता रागे भरली
का तुझ्यापासुनी चुकली l सांग रे!

हा हाय कोकरू बचडे l किति बे बे करुनी अरडे
उचलोनि घेतले कडे l गोजिरे!

मग थोपटुनी म्या हाते l आणिले गृहाते त्याते
तो नवल मंडळीना ते l जाहले.

गोजिरे कोकरू काळे l नउ दहा दिनांचे सगळे
मउमऊ केश ते कुरळे l शोभले.

लाडक्या का असा भीसी l मी तत्पर तव सेवेसी
कोवळी मेथि ना खासी l का बरे?

बघ येथे तुझियासाठी l आणिली दुधाची वाटी
परि थेंब असा ना चाटी l का बरे?

हळु दूध थोडके प्याले l मग त्वरे तोंड फिरवीले
कोकरु बावरुन गेले l साजिरे!

लटकून छातिशी निजले l तासही भराभर गेले
विश्व हे मुदित मग केले l रविकरे

घेउनी परत त्या हस्ती l कुरवाळित वरचेवरती
कालच्या ठिकाणावरती l सोडिले.

तो माता त्याची होती l शोधीत दूर शिशुसाठी
दगडांचे तरुचे पाठी l हाय रे!

हंबरडे ऐकू आले l आनंदसिंधु ऊसळले
स्तनि शरासारखे घुसले l किति त्वरे!

- वि. दा. सावरकर (विनायक दामोदर सावरकर)