प्रेमस्वरूप आई - मराठी कविता (माधव ज्यूलियन)

ज्येष्ठ आणि प्रसिद्ध मराठी कवी माधव ज्यूलियन (माधव त्र्यंबक पटवर्धन) यांची प्रेमस्वरूप आई ही लोकप्रिय मराठी कविता.

प्रेमस्वरूप आई, वात्सल्यसिंधु आई

---

प्रेमस्वरूप आई - मराठी कविता (माधव ज्यूलियन)

ज्येष्ठ आणि प्रसिद्ध मराठी कवी माधव ज्यूलियन (माधव त्र्यंबक पटवर्धन) यांची प्रेमस्वरूप आई ही लोकप्रिय मराठी कविता.

---

प्रेमस्वरूप आई! वात्सल्यसिंधु आई!
बोलावु तूज आता मी कोणत्या उपायी?

तू माय, लेकरू मी; तू गाय, वासरू मी
ताटातुटी जहाली, आता कसे करू मी?
गेली दुरी यशोदा, टाकुनी येथ कान्हा
अन्‌ राहिला कधीचा तान्हा तिचा भुका ना?

तान्ह्यास दूर ठेवी, पान्हा तरीही वाहे
जाया सती शिरे जी आगीत, शांत राहे
नैष्ठुर्य त्या सतीचे, तू दाविलेस माते
अक्षय्य हृत्प्रभूचे सामीप्य साधण्याते

नाही जगात झाली आबाळ या जिवाची
तूझी उणीव चित्ती आई, तरीहि जाची
चित्ती तुझी स्मरेना काहीच रूपरेखा
आई हवी म्हणूनी सोडी न जीव हेका

विद्याधनप्रतिष्ठा, लाभे अता मला ही
आईविणे परी मी, हा पोरकाच राही
सारे मिळे परंतू, आई पुन्हा न भेटे
तेणे चिताच चित्ती, माझ्या अखंड पेटे

आई, तुझ्या वियोगे, ब्रम्हांड आठवे गे!
कैलास सोडुनी ये उल्केसमान वेगे
किंवा विदेह आत्मा, तूझा फिरे सभोती
अव्यक्त अश्रुधारा, की तीर्थरूप ओती!

ही भूक पोरक्याची, होई न शांत आई
पाहुनीया दुज्यांचे वात्सल्य लोचनाही
वाटे इथूनि जावे, तूझ्यापुढे निजावे
नेत्री तुझ्या हसावे, चित्ती तुझ्या ठसावे!

वक्षी तुझ्या परी हे केव्हा स्थिरेल डोके
देईल शांतवाया हृत्स्पंद मंद झोके?
घे जन्म तू फिरूनी, येईन मीही पोटी
खोटी ठरो न देवा, ही एक आस मोठी!

- माधव ज्यूलियन (माधव त्र्यंबक पटवर्धन)