मी फूल तृणातील इवले - मराठी कविता (मंगेश पाडगांवकर)

ज्येष्ठ आणि प्रसिद्ध मराठी कवी मंगेश पाडगांवकर यांची मी फूल तृणातील इवले ही लोकप्रिय मराठी कविता.

जरि तुझिया सामर्थ्याने, ढळतील दिशाही दाही

---

मी फूल तृणातील इवले - मराठी कविता (मंगेश पाडगांवकर)

ज्येष्ठ आणि प्रसिद्ध मराठी कवी मंगेश पाडगांवकर यांची मी फूल तृणातील इवले ही लोकप्रिय मराठी कविता.

---

जरि तुझिया सामर्थ्याने
ढळतील दिशाही दाही
मी फूल तृणातील इवले
उमलणार तरिही नाही

शक्तीने तुझिया दिपुनी
तुज करितील सारे मुजरे
पण सांग कसे उमलावे
ओठातील गाणे हसरे

जिंकील मला दवबिंदू
जिंकील तृणाचे पाते
अन् स्वत:स विसरून वारा
जोडील रेशमी नाते

कुरवाळीत येतील मजला
श्रावणांतल्या जलधारा
सळसळून भिजली पाने
मज करतिल सजल इषारा

रे तुझिया सामर्थ्याने
मी कसे मला विसरावे?
अन् रंगांचे गंधांचे
मी गीत कसे गुंफावे

येशिल का सांग पहाटे
किरणांच्या छेडित तारा
उधळीत स्वरांतुन भवती
हळु सोनेरी अभिसारा

शोधीत धुक्यातुन मजला
दवबिंदू होउनि ये तू
कधी भिजलेल्या मातीचा
मृदु सजल सुगंधित हेतू

तू तुलाच विसरुन यावे
मी तुझ्यात मज विसरावे
तू हसत मला फुलवावे
मी नकळत आणि फुलावे

पण तुझिया सामर्थ्याने
ढळतील दिशा जरि दाही
मी फूल तृणातील इवले
उमलणार तरीही नाही

- मंगेश पाडगांवकर