दाटलेले आभाळ कालचे (मराठी कविता)

दाटलेले आभाळ कालचे (मराठी कविता) - मराठीमाती डॉट कॉम चे सभासद कवी वैभव गव्हाळे यांची दाटलेले आभाळ कालचे ही कविता.

दाटलेले आभाळ कालचे आज मोकळे किती

---

दाटलेले आभाळ कालचे (मराठी कविता)

मराठीमाती डॉट कॉम चे सभासद कवी वैभव गव्हाळे यांची कविता ‘दाटलेले आभाळ कालचे’.

---

दाटलेले आभाळ कालचे आज मोकळे किती
रस्त्यावरचे वळण ओळखीचे आज वेगळे किती

नाही म्हणत होतो तरीही चटके देत होते
या अफाट उन्हाचे वय आज कोवळे किती

विसावा मिळेल जरा म्हणून हाक मारत होतो
त्या सावलीचे दारी आज सोहळे किती

उखाणे ज्याचे काल गाता येते नव्हते
त्या रेशमी सुखाचे आज डोहाळे किती

स्पर्श जरा नाजूकच तो ही नाकारत होते
त्या मोसमी फुलाचे आज पावसाळे किती

पाठलाग जरा थांबत नाही ज्याचा कधी
त्या दुःखाचे पाय आज पांगळे किती

प्रतिमा ही माझी पाण्यात पाहत होते
त्या आरश्याचे रुप आज वेगळे किती

- वैभव गव्हाळे