तू दिलेलं - मराठी कविता

तू दिलेलं, मराठी कविता - [Tu Dilela, Marathi Kavita] तू दिलेलं मागतोस, उपरेपणानं, तुझंच तुला देताना, आक्रसणारं माझं मन.

तू दिलेलं मागतोस, उपरेपणानं, तुझंच तुला देताना, आक्रसणारं माझं मन

तू दिलेलं मागतोस
उपरेपणानं
तुझंच तुला देताना
आक्रसणारं माझं मन
ठसठसणारी उरी जखम
तुझ्या देण्यात विरघळून गेलीय
काय देऊ तुझंच तुला...?
तुझं देणं होतं,
काठ पदर नसणारं वस्त्र
मी ते पांघरलं
सहनशीलतेचा काठ शिवून
संयमाचा पदर पांघरून
आता वस्त्र फाटलंय...
उरलेत काठ नि पदर
ज्यात अडकलेत तुझ्या देण्याचे
काही धागे...
जे वेगळे करताना,
पदर फाटेल, काठ उसवेल...
मला न संपवता
तुझं तुला काय देऊ
देताना तुझ्या हातानी
तू कोरलंस... विश्वासाचं काजळ
नेत्रांच्या कडा पुसता पुसता
काजळ उडून गेलं
नेत्रकडा जखमी झाल्या
सर्वस्व देण्याचं वचन देणारा तू अंधुक दिसू लागलास
तुझा मागणारा आवाज वाढतोय...
थोडा थांब...
तुझा आवाज मनापर्यंत पोचू देणार नाही
मी काठ पदर उराशी घेऊन जगेन
डोळे उघडे ठेवून


अनुराधा फाटक | Anuradha Phatak
सभासद, मराठीमाती डॉट कॉम
मराठी कविता या विभागात लेखन.

टिप्पणी पोस्ट करा

स्पॅम टिप्पण्या टाळण्यासाठी, सर्व टिप्पण्या प्रदर्शित करण्यापूर्वी नियंत्रित केल्या जातात.