भेट - मराठी कविता

भेट, मराठी कविता - [Bhet, Marathi Kavita] आभाळ भरून आल्यानंतर, एकमेकांना भेटण्याचा संकेत अगदी अलीकडचा.

आभाळ भरून आल्यानंतर, एकमेकांना भेटण्याचा संकेत अगदी अलीकडचा

आभाळ भरून आल्यानंतर
एकमेकांना भेटण्याचा संकेत अगदी अलीकडचा
सर्व ऋतू खुडून तिच्या तळहातावर मी
नजरेतील व्याकूळ प्रार्थना ती मला नजराणा देते
संध्याकाळ मंद मंद चुळबुळत राहते
आकाशाभोवती
बागेतल्या बुटक्या गवतावरून
सरपटत राहतो
मनातला हिरवा साप
नुसत्या आभाळाकडे पाहून
पावसाचे अनुमान करता येत नाही
म्हणून तिच्या तळहातावरची आरास
मी विस्कटून टाकतो
ती आक्रोश करत राहते, मौनातून मौनात
इथल्या तांबूस संबंधातला पालापाचोळा
झटकत ती उठते आणि
शब्दांचा गजर बंद करून
चालू लागते प्रार्थनेकडे

आता
चर्चबेल अधिक जोरात
घणघणत राहते
माझ्या निरभ्र मेंदूत

संदेश ढगे

सभासद, मराठीमाती डॉट कॉम

मराठी कविता या विभागात लेखन.

अधिक माहिती पहा । सर्व लेखन पहा

अभिप्राय

तुमची टिप्पणी आमच्यासाठी महत्त्वाची आहे!
तुमचा अभिप्राय / टिप्पणी ही आम्ही कसे कार्य करतो? त्यातील सुधारणांसाठी आणि आम्ही सातत्याने उच्च-गुणवत्तेची सेवा प्रदान करतोय की नाही हे समजून घेण्यासाठी आमच्यासाठी महत्वाची आहे.