अशाच एका सायंकाळी (मराठी कविता)

अशाच एका सायंकाळी (मराठी कविता) - मराठीमाती डॉट कॉम चे सभासद कवी मुकुंद भालेराव यांची अशाच एका सायंकाळी ही कविता.

अशीच तिथे घरे होती, वहात होती गार हवा

---

अशाच एका सायंकाळी (मराठी कविता)

मराठीमाती डॉट कॉम चे सभासद कवी मुकुंद भालेराव यांची कविता ‘अशाच एका सायंकाळी’.

---

अशीच तिथे घरे होती
वहात होती गार हवा
मुले अशीच खेळत होती
पहात होती निलनभा

उंच होते हिरवे डोंगर
सभोवताली शुभ्र आभा
मन माझे हे थिरकत होते
पहात होतो दिव्य प्रभा

सुंदर लोभस शांत सरीता
संथपणे ती वाहत होती
चिवचिवणारे सुंदर पक्षी
घेऊन प्रेम वाहत होती

नदीकिनारी छोटे मंदिर
भजनाचे संगीत असे
मनामनाच्या अंतरातही
दिव्यत्वाचे भाव वसे

सायंकाळी गाभार्यातून
मंदज्योतिची रंगफुले
दिव्यगान कुणी गाताना मग
मनी भक्तिचे प्रेमफुले

एक तपस्वी गौर तरुणी
शांत माधवा आठविते
मधुर मधुर ती आर्तस्वराने
प्रिय गोविंदा साठविते

मीपण माझे हरवुन गेलो
नदीकिनारी गाव असे
गावामधल्या समस्त गोपी
नाचत येता शाम दिसे

रामामधला शाम निराळा
गोपीसाठी रास रचे
शामामधला राम निराळा
सितेला तो प्रिय असे

राधामाधव मधुर मानसी
प्रेमाचे स्वरपुष्प जसे
सितासिता वनी भटकता
रामाचे निजरुप दिसे

- मुकुंद भालेराव