मी नाव शोधतो आहे - मराठी कविता

मी नाव शोधतो आहे, मराठी कविता - [Mi Naav Shodhato Aahe, Marathi Kavita] मी नाव शोधतो आहे, मी नाव शोधतो आहे, संथ प्रवाही नदीचा मी ठाव शोधतो आहे.

मी नाव शोधतो आहे, मी नाव शोधतो आहे
संथ प्रवाही नदीचा मी ठाव शोधतो आहे

पहाटेचे धुके पिऊनी
कैकदा कैफात चाललो
हातांनी स्पर्शून पाणी
कधी दवात थोडा भिजलो

मी मनात गुणगुणणारे ते भाव शोधतो आहे
संथ प्रवाही नदीचा मी ठाव शोधतो आहे

मुसाफिर गावा चाललो
हलकेव व्हल्हे फिरले
नदीचे निर्मळ पाणी
आपसूक बाजूस वळले

नावेचे आठव स्मरूनी उरी घाव पेलतो आहे
संथ प्रवाही नदीचा मी ठाव शोधतो आहे

वाटले न तेव्हा कधीही
हे चित्र पालटे होईल
नावेचे नाव पुसुनी
मज गाव पोरका होईल

हिरमुसुनी मी नियतीचा हा डाव पाहतो आहे
संथ प्रवाही नदीचा मी ठाव शोधतो आहे

उमेश कुंभार

सभासद, मराठीमाती डॉट कॉम

मराठी कविता आणि मराठी गझल या विभागात लेखन.

अधिक माहिती पहा । सर्व लेखन पहा