एक बामण ढसाळलेला : मुकुंद शिंत्रे

॥ मानुस्मृती ॥

आज मी गद्दार-आलोय तुमच्या विध्वंसक वेदांशी

भंडाफोड गीतेशी आणि पाणवट पुराणांशीही

हजारो नर्क कोसळले तरी ना हरकत !

अशाअंशाने चुकता करणार मी हिशोब

संस्कृतीतल्या हरेक दलालीचा !

मनूच्या वारसदारंनो बुब्बळे बाहेर काढू नका

घामेजलेले टाचा तळवे उगा उराशी बडवू नका

तुमच्याच अवलादीतलं नव बेण

(तिन्ही लोकातला श्रेष्ट ब्राम्हण ? )

नवी स्मृती घडवीत आहे

मानुस्मृती सांगत आहे --- घ्या लिहून !

इथून पुढे विषमतेच्या साक्षीला

परमात्मा तुमचा धावणार नाही

अन्यायाच्या उद्यापनाला

सत्यनारायण पावणार नाही

माणसाला मारुन

कुठलाही प्राणी भजणार नाही

वसुधैव कुटुंबकम सांगून

`राजवाडा' मांडणार नाही

चातुर्वर्ण्याला मान तुकवून

खोट समर्थन सांगणार नाही

माणूसकीची पिंड, न्यायाचा अभिषेक आणि समतेचे स्तोत्र

उद्या जगाल आणि लावाल `मानुस्मृतीच' नव गोत्र