सात दिवस आणि सहा रात्री भाग २

लेखन: | प्रकाशन: संपादक मंडळ | १६ मार्च २०१८
सात दिवस आणि सहा रात्री भाग २ - मराठी कथा | Seven Days And Six Nights Part 2 - Marathi Katha
सात दिवस आणि सहा रात्री भाग २

पण नंतर त्याला तो आवाज प्रार्थनाचा असल्याची जाणीव होते व अजिंक्य बाथरूमच्या दिशेने पाहतो. तर त्याच्या मिठीतील तरूणी अचानक नाहीशी होते. त्याला क्षणभर काय झाले हे कळतच नाही. बाथरूममधून प्रार्थनाच्या ओरडण्याचा आवाज ऐकून नेहा, किरण, विवेक त्या रूममध्ये येतात. नेहा बाथरूमचा दरवाजा उघडते तर अजिंक्यला तिथे प्रार्थना दिसते. प्रार्थना बाथरूममधून अजिंक्यला रागवत बाहेर येते. पण नेहा तिला शांत करते व म्हणते, “ए बाबांनो, तुम्ही पुन्हा नका सुरू होऊ. अजिंक्य तू पटकन फ्रेश हो व डायनिंग हॉलमध्ये लंचला ये.” ते चारही जण खाली डायनिंग हॉलमध्ये जातात.

अजिंक्य आपल्याला भास झाला असेल असे समजतो व तोही फ्रेश होऊन डायनिंग हॉलमध्ये जातो. सर्वजण गप्पागोष्टी करत जेवण करतात. जेवण झाल्यावर अजिंक्य प्रार्थनाला बाहेर येण्याबाबत विचारतो. सुरवातीला ती ‘नाही’ म्हणत असते पण इतर मित्राच्या सांगण्यावर ती जायला तयार होते. ते दोघे लॉजच्या बाहेर फिरण्यासाठी जातात. दोघेही शांत असतात मग अचानक प्रार्थना अजिंक्यला म्हणते, “अजिंक्य, मी इतका वेळ तुला आवाज देत होते. दार ठोठावत होते. तरी तुझे लक्ष नव्हते. मी किती घाबरले होते.” अजिंक्य तिला दिलगिरी व्यक्त करत सॉरी, सॉरी प्रार्थना म्हणतो. यावर प्रार्थना त्याला म्हणते, “तुझं नेहमीच आहे हे. आधी चूक करायची मग सॉरी बोलायचं. त्यादिवशी देखील असेच केलेस. तुला माहितेय कि आपले लव्हशीप रिलेशन सुरू होऊन उद्या दोन वर्षे पूर्ण होत आहेत. पण तुला त्याचं काहीच नाही.” असे म्हणून ती नाराज होऊन जात असते.