स्वप्न माझे भणंग, तू न इथे
स्वप्न माझे भणंग, तू न इथे
प्रीत माझी अभंग, तू न इथे
अन्तरी वेदना, दिव्यासम या
मी अभागी पतंग, तू न इथे
रोज श्र्वासातुनी, पितो तुजला
का म्हणू तू न संग, तू न इथे
रात्र गेली भिजून, अश्रूंनी
जाणण्या अन्तरंग, तू न इथे
मी किनाऱ्यवरी, उभा, दुखी
जाणतो हा तरंग, तू न इथे
आठवांचा, वळीव कोसळतो
भान हरपून दंग, तू न इथे
टाळ चिपळ्यांत मी, जरी गढलो
बोलतो हा मृदंग, तू न इथे
केतकीबन, `इलाही' जळले रे!
सोबतीला भुजंग, तू न इथे